今日同為為去健康院。六個月四天人仔重7.79KG, 維持係50生長線, 高69CM,
75-90生長線之間。媽媽好滿意。
為為而家大概每日一至兩餐人奶三-四餐奶粉，我呢個奶媽任務總算達標完成，我要求太低，總之餵到六個月就好滿足了，從不要求全人奶。厭奶期好似仲未係為為身上出現，而家每餐大概飲6〜7安奶。開始食米糊, 但唔係太接受,
食3安米糊有時都食唔哂, 食到最尾發脾四。過兩日試下食粥仔, 睇下會唔會好D。遺憾我要返工,
要試新嘢就要等我放假, 唔想俾工人姐姐搞。
講起脾氣就似乎家姐細果時好D, 細佬有時發脾四想來大聲到我耳瘼穿咁制, 有時仲望住人呱呱叫, 好似鬧人咁,
真係要好好教。
可能冬天穿衣太多，為為仲未反到身，不過見佢一著少件衫就想反身，我唔太擔心。而家一瞓係度就捉腳仔, 但仲未識放入口。本來都打算由佢自然發展, 但今日健康院姑娘話佢坐唔到, 條腰唔係好夠力,
9個月要返去睇發展, 要多D訓練佢坐。
