近來媽媽真係好忙， 公司MUG鬼嘢都堆埋係六月底前攪掂， 真係人都巔。
雖然返工又忙又煩， 但放工一見到個寶貝女， 就真係MUG煩嘢都放低哂， 休息下， 返到公司先再諗啦!!
講返姿姿。
姿姿第13個月零第一日大， 媽媽就同姿姿去咗健康院（因為12個月時一直都冇時間去）， 唉， 去完返來媽媽真係頭都大埋，
姿姿得17磅多D， 生長線由25跌到落7.....真係唔知點同佢增肥， 佢真係好瘦，
佢唔著衫個身就十足十三毛流浪記裡面個三毛咁瘦。。。。唯一安慰D就係高度仍然保持係75生長線，
同埋姑娘話佢反應唔錯（都都唔知係咪安慰我先咁講。。。。）。
咁唯有跟姑娘意見， 開始比佢食三餐固體， 減一餐奶。開頭我地都驚小姐唔肯三餐食同一樣嘢， 好彩而家試落又OK wor，
呢個星期食嘢仲合作咗好多， 好爽手食哂D嘢， 如果之後一直都係咁就好啦。。。。
睡方面都冇MUG進步， 因為有人實在太爛玩， 要玩到好攰好攰先肯瞓。每日頂多加埋都係瞓12﹣13個鐘，
唔算多。仍然有半夜醒搵人， 但呢三晚無端端自己瞓天光至醒， 雖然醒咗都係照搵人， 但都有進步， 起碼我可以一覺瞓天光， 希望佢可以保持落去就好啦!
仲有一樣有進步既係， 姿姿終於都肯未瞓著時俾我地放佢落床仔， 然後係床邊陪佢瞓。佢呢期好冧“First of May"同“ Try to
remember"， 媽媽一唱呢兩首， 姿姿就好快就冇還擊之力， 好快瞓著﹏
認知方面， 佢而家都明我地講既嘢，佢講就講多幾個字， 姐姐， BYE BYE etc....最好笑係我教咗佢叫人俾嘢佢係要先“請請”，
唔可以手指指就算， 一教完佢就好快識活學活用，唔駛人提佢佢都識做手勢請請， 沖涼時仲係咁向爹爹請請請請(就算你話唔俾佢都照請，
請到你頂佢唔順俾佢為止。。。）， 直到爹爹幫佢攞哂架上既沖涼玩具俾佢為止。。。好攪笑!
好多時見到佢請請個樣好誠懇， 又可憐，次次都甘願俾佢點， 順下佢意啦， 一下有機會影低佢，比大家笑下先 ˆˆ
啲文法錯晒,應該係得到sky纖瘦身型o既遺傳,哈哈!!
Reply this
comment
Keith 
遺傳左sky纖瘦身型o既優良傳統~
