新校董毓民克勤 誓保中大烽火台
【明報專訊】對於唔少中大人嚟講，烽火台都有一重特別意義，唔少學生運動都喺烽火台前舉行，而且多年嚟仲有一個傳聞，千祈唔好「捐過」烽火台上嘅雕塑品「門」，否則便有畢唔到業嘅詛咒。
而近日中大校長劉遵義 提出，將校園本部圖書館擴建，工程將影響到烽火台，話要將雕塑先拆卸、遷移，之後先有機會還原。雖然烽火台有機會重見天日，但中大學生已經好不滿，一班身為校友、校董嘅議員，噚日都話好反對校方咁做。新任校董民建聯 陳克勤同社民連黃毓民 都話要誓保烽火台。
毓民難忘與曾鈺成 烽火台龍門陣
毓民話，雖然佢唔係中大校友，但佢最深刻嘅係喺1994年時，佢同家吓嘅立法會 主席曾鈺成喺烽火台嚟一個「中大龍門陣」，辯論究竟係咪要成立臨立會。毓民又話佢做校董，會以學生為本，所以一定會出聲，又會去中大聽吓學生嘅意見。但佢補充，自己只係80幾個校董嘅其中一個，未必保證可以捍衛到烽火台。克勤仔﹕搬同拆都唔贊成
另一校董兼校友嘅克勤仔就話，無論搬定拆，佢都唔贊成，因為烽火台係中大好重要嘅象徵，佢覺得校方應該諮詢喺中大畢業嘅建築師，蒐集意見。克勤仔又話會以書面形式反映意見，亦會同校友見面。但校方通知佢，校董會要明年1月先舉行。
至於校友梁美芬更加話，拆烽火台等於無咗中大，佢話當年好多學生運動都喺烽火台舉行，雖然當時未有雕塑品，但嗰時為反對中大學制四改三，身為書院學生會會長嘅佢，仲試過抬棺材反對改制！
70年代畢業嘅會計界陳茂波 就話，雖然佢讀書時無烽火台，但就留意到劉遵義已經唔係第一次做啲有爭議嘅事，陳茂波話，政府都同公眾溝通，學校亦應該搞多啲諮詢，同學生溝通吓。遲陳茂波一年畢業嘅民主黨 張文光 就話，唔信校方夠膽拆完之後唔擺返原位。
*********************************************************************
中大個山頭成日鑿嚟鑿去, 攪到d花買少見少都唔係好happy, 而家仲要拆烽火台, 真係有d 過份wor.....
成個campus master plan會將校園來一次翻天覆地大變身.
唉!
沒有留言:
張貼留言